སྙན་ངག་ནི་ངའི་ན་ཟུག་དང་། ཁེར་ལབ་ཡིན།
མི་ཚོས་ང་ལ་དྲི་བ་འདི་འདྲ་ཞིག་འདྲི་བཞིན་འདུག
ཁྱོད་ཀྱིས་སྙན་ངག་ཅིའི་ཕྱིར་འབྲི་བཞིན་ཡོད།
སྙན་ངག་བྲིས་ན་ཁྱོད་ལ་ཕན་ཐོགས་ཅི་ཞིག་འདུག
རེད་རེད། ཁོང་ཚོའི་བསམ་ངོར་ངས་སྙན་ངག་འབྲི་བ་ནི་གཞན་ལ་མཁས་མདོག་སྟོན་པའི་བཟོ་འདྲ་ཞིག་མཐོང་གི་ཡོད་པ་འདྲ།
ཡང་ན་ངོམ་བཟོ་བསྟན་པའི་བཟོ་འདྲ་ཞིག་ཚོར་གྱི་ཡོད་པ་འདྲ།
འོན་ཀྱང་དེ་འདྲའི་ངོས་འཛིན་བྱས་པ་ནི་རྦད་དེ་ནོར་བ་རེད།
དྲང་པོར་བཤད་ན། ངའི་སྙན་ངག་འབྲི་ཀློག་གི་དགའ་ཞེན་དེ་དང་ང་རང་ཉིད་གཉིས་ཅུང་བར་ཐག་ཆགས་ཟིན་པ་ཡིན།
རེད་དེ། ཡིན་ན་ཡང་ད་ལྟ་ཚིག་རིས་སླ་བཞིན་པ་འདི་ནི་རྒྱུ་མཚན་གཞན་ཞིག་རེད།
ན་ཟུག༽
མི་བུ་རང་ག་བ་ཞིག་ལ་དགའ་སྐྱོ་ཆགས་སྡང་གི་རང་བཞིན་ལས་མ་འདས་པ་ཡིན་ཙང་།
དགའ་སྐྱོ་ཆགས་སྡང་གི་རང་བཞིན་དེ་ཁོང་ནས་ལུད་དུས། ངས་ཅི་ཞིག་ལབ་དགོས་ཐུག་གི་ཡོད་རེད།
དེ་དུས་ང་ལ་ན་ཟུག་ལངས་པ་རེད། འོན་ཀྱང་ན་ཟུག་དེ་ངས་སུ་ཞིག་ལའང་ལབ་སྙིང་མི་འདོད། དེ་ནི་ཚིག་རིས་བསླས་མ་ཁོ་ནས་མཚོན་པར་འདོད་པ་ཡིན།
དེས་ན་ངས་སྙན་ངག་འབྲི་བ་ནི་ངའི་ན་ཟུག་མཚོན་སྟངས་ཤིག་རེད། ངའི་སྙན་ངག་རེ་རེ་ནི་ངའི་ཁོང་གི་ན་ཟུག་རེ་རེ་རུ་རློམ་ཆོག་པ་རེད།
ངའི་ན་ཟུག་རེ་རེ་ཚིག་རིས་བསླས་མའི་ལམ་ནས་མཚོན་ཐུབ་ན། དེ་དུས་ང་ལ་ངལ་གསོ་ཞིག་ཐོབ་པར་འདོད་པ་རེད།
ཁེར་ལབ།༽
མ་གཞི་སེམས་ཀྱི་ན་ཟུག་རེ་རེ་ཚིག་རིས་སུ་བསླས་ཡོང་དུས།
ཚིག་རིས་དེའི་ནང་དོན་ཇི་བཞིན་པ་ཞིག་ང་རང་མིན་པའི་མི་གཉིས་པ་ཞིག་གིས་ཕལ་ཆེར་ཧ་གོ་ཐུབ་རྒྱུ་མ་རེད།
དེ་ནི་ངས་བསམ་བཞིན་དུ་བྱས་པ་རེད། སྣང་ཚུལ་དེ་འདྲ་ཞིག་གི་ངོས་ནས་བལྟས་ན། ངའི་སྙན་ངག་ནི་ང་རང་ཉིད་ཀྱི་ཁེར་ལབ་ཅིག་ཏུ་ཆགས་པ་རེད།
དེ་ཡང་ཡིན་ཏེ། ངའི་སྙན་ངག་ནི་ང་རང་ཉིད་ཀྱི་ཁེར་ལབ་ཡིན།
ངའི་སེམས་ནང་གི་འཇིག་རྟེན་དེ།
འཇིག་རྟེན་གཞན་ཞིག་རེད། འཇིག་རྟེན་དེ་ནས་གང་ཟག་གཞན་གྱིས་མཐོང་མི་ཐུབ་པའི་སྣང་ཚུལ་མང་པོ་ཞིག་མཐོང་གི་ཡོད་ཙང་།
ངའི་འཇིག་རྟེན་དེའི་སྐོར་སུ་ཞིག་ལ་འགྲེལ་བཤད་བརྒྱབས་ནའང་། ངོས་ལེན་བྱེད་ཀྱི་མ་རེད།
དེས་ན་ངའི་སྐད་ཆ་ནི་ང་རང་ཉིད་ཀྱི་ཁེར་ལབ་རང་བཞིན་ལས་མ་འདས་པས་ན། སྙན་ངག་ནི་ང་རང་ཉིད་ཀྱི་ན་ཟུག་དང་ཁེར་ལབ་ཁོ་ན་ཡིན།།
2019
