ར་བཱིནྡྲ་ནཱ་ཐ། ཋཱ་ཀུར་གྱི་སྙན་ངག་ཚན་པ་གཅིག བཀླགས་འགྲེལ་དང་། ཕྲན་དཔྱད།

སྙན་ངག་པ།

"ཨཱ། སྙན་ངག་པ། མཚན་གྱི་དུས་ཟིན་ལ་ཉེ་ཞིང་། ཁྱེད་ཀྱི་དབུ་སྐྲ་སྐྱ་བོར་ལོག་ཅིང་མཆིས།

"ཁྱེད་ཀྱིས་ཁེར་རྐྱང་གི་མནོ་བསམ་ལས་ཚེ་ཕྱི་མའི་གནས་ཚུལ་དེ་ཐོས་སམ།?"

"ད་ནི་མཚན་མོའོ་"སྙན་ངག་པས་བཤད་རྒྱུར་"གྲོང་གསེབ་དེ་ནས་མི་ཞིག་གིས་འབོད་སྲིད་ངེས་སྙམ་ཞོར།

དེ་ནི་ཅི་ཙམ་འཕྱི་བོར་འོང་སྲིད་ནའང་། བདག་གིས་ཉན་ཞིང་མཆིའོ།།

"ངས་ལྷན་འཛོམས་མ་བྱུང་ཞིང་ན་གཞོན་པའི་སེམས་པ་དེ་དག་མཉམ་དུ་འཛོམས་མིན་དང་།

སྐོམ་པ་ཆེན་པོའི་མིག་ཟུང་ཆ་གཉིས་ཀྱིས་ཁོང་ཚོའི་ལྷིང་འཇགས་དཀྲོགས་པ་དང་།

ཁོང་ཚོའི་ཚབ་ཏུ་སྐད་ཆ་བཤད་སླད་རོལ་དབྱངས་ལ་རེ་འབོད་ཞུ་མིན་ལ་ཅེར་ཞིང་མཆིའོ།།

"གལ་ཏེ་ང་རང་ཚེ་སྲོག་གི་འཇུག་ངོགས་སུ་བསྡད་དེ། འཆི་བ་དང་ཚེ་ཕྱི་མར་སེམས་ལས་བྱས་ན།

སུ་ཞིག་ནི་གནས་དེ་རུ་ཁོང་ཚོའི་བརྩེ་གདུང་གི་གླུ་གཞས་འཐག་མཁན་ཡིན།?

"ས་སྲོད་ཀྱི་སྐར་མ་ཡལ་ཞིང་གདའ།

"གཤིན་ཆོག་སྲེག་ཤིང་གི་དམར་མདངས་ནི་དབེན་འཇགས་ཀྱི་གཙང་འགྲམ་ནས།

ཁད་ཀྱིས་ཤི་སོང་ལ།

"ཟླ་འོད་ཟད་པོའི་ཀློང་གི་ཁང་སྟོང་དེའི་ཁྱམས་ར་ལས་ཅེ་སྤྱང་གི་ཚོགས་སྡེབ་ཀྱིས་ངུ་སྔངས་བྱེད་ཅིང་མཆི།

"གལ་སྲིད་འཁྱམས་པོ་རྣམས་ཁྱིམ་དང་བྲལ་ནས་གནས་འདི་རུ་མཚན་མོར་བལྟ་བ་དང་། མུན་ནག་གི་ཤབ་ཤུབ་ལ་མགོ་བསྒུར་ཏེ་ཉན་དུ་འོང་བ་ལ།

གལ་ཏེ། ངས་སྒོ་རྣམས་བརྒྱབས་ནས་རང་ཉིད་མི་རྟག་པའི་འཆིང་ཐག་ལས་གྲོལ་རྩིས་བྱེད་པ་འོས་ན།

སུ་ཞིག་ནི་གནས་དེ་རུ་ཁོང་གི་རྣ་བར་ཚེ་སྲོག་གི་གསང་བ་ལྐོག་ལབ་བྱེད་མཁན་ཡིན།

"ངའི་མགོ་སྐྲ་དཀར་པོར་གྱུར་པ་ནི་ཅང་མ་ལགས།

"ང་ནི་ནམ་ཡང་གྲོང་གསེབ་ཀྱི་གཞོན་ཤོས་ལྟར་གཞོན་ལ་རྒན་ཤོས་བཞིན་རྒན་པའོ།།

"མི་ཁ་ཤས་ལ་བབ་ཆགས་དང་ཡིད་དུ་འོང་བའི་མཛུམ་མདངས་ལྡན་ཞིང་།

"ཁ་ཅིག་གི་མིག་ལ་གཡོ་ཟོལ་གྱི་འོད་མདངས་མངའ།

ཁ་ཅིག་ལ་ཉིན་དཀར་མོར་མིག་ཆུ་འཁོར་ཞིང་།

འགའ་ཤས་ཀྱི་སྤྱན་ཆབ་མུན་ནག་ཏུ་བསྐུངས་ནས་ཡོད།

ཁོང་ཚོར་གདོན་མི་ཟ་བར་ང་རང་མཁོ་བས།

བདག་ལ་ཚེ་ཕྱི་མར་སྟོང་བསམ་བྱེད་ཁོམ་མི་གདའ་ལགས།

"ང་རང་སུ་དང་ཡང་ན་ཟླ་ཡིན་པས། བདག་གི་སྐྲ་ལོ་སྐྱ་བོར་གྱུར་བར་ནོངས་པ་ཅི།?"

ཟླ་བ་གཞོན་ནུས་བསྒྱུར་པའི་༼མེ་ཏོག་ཕྲེང་རྒྱུད།༽(The Gardener) ཚན་པ་གཉིས་པ་ལས་བཤུས།

བཀླགས་འགྲེལ་དང་ཕྲན་དཔྱད།

ཐོག་མའི་སྐད་ཆ།

དོན་དམ་པའི་སྙན་ངག་གི་སྐད་ཆ་ནི་མི་རིགས་ཤིག་གི་ཆེས་ཚད་མཐོ་བའི་སྒྱུ་རྩལ་གྱི་སྐད་ཆ་དང་། སྐད་ཆའི་ཉིང་ཁུ་ཡིན་ལ། དེ་འཆད་མཁན་གྱི་སྙན་ངག་པ་ཡང་མི་རིགས་དང་སྤྱི་ཚོགས་ཤིག་གི་མགྲིན་ཚབ་པ་དང་། གདོང་མཆོང་པ། སྣེ་ཤན་པ་བཅས་ཡིན། དེས་ན་དོན་དམ་པའི་སྙན་ངག་པ་ཞིག་ཡིན་ན་ཁོ་དང་ཁོས་བཤད་པའི་སྐད་ཆ་ལ་ལངས་ཕྱོགས་དང་འགན་ཁྲི་ཞིག་དགོས་པ་ནི་མ་མཐའི་ས་མཚམས་རེད།

དེས་ན་ང་ཚོས་ཀྱང་དེ་འདྲ་ཞིག་ལ་འཚོལ་སྙེག་བྱེད་བཞིན་ཡོད། གཤམ་དུ་ང་ཚོའི་ཚབ་མཚོན་རུང་བའི་སྙན་པ་ངག་པ་ཞིག་དང་། ཁོང་གི་སྙན་ངག་བཀླགས་ཆོག།

བརྩེ་གདུང་གི་འཇིག་རྟེན། སྙན་ངག་པའི་འགན་ཁྲི།

གོང་གི་སྙན་ངག་གི་ཚན་པ་དང་པོ།

འདིར་སྣང་འཇིག་རྟེན་གྱི་འཚོ་བའི་རྩ་བ་ནི་བྱམས་པ་དང་བརྩེ་བ་ཡིན། བྱམས་པ་དང་བརྩེ་བས་དངོས་ཡོད་འཇིག་རྟེན་ལ་ཁ་དོག་བྱུགས་ཏེ་བཀྲག་མདངས་འཚེར་བར་བྱས་ཡོད། དོན་དམ་པའི་སྙན་ངག་པ་འདིས་ཀྱང་འདིར་སྣང་འཇིག་རྟེན་གྱི་འཚོ་བའི་རྩ་བ་སྟེ་བྱམས་པ་དང་བརྩེ་བ་ལ་འཇུས་འདུག

ས་སྲོས་ཀྱི་ཡོལ་བ་ནག་པོ་མིག་མདུན་གྱི་བྱ་དངོས་ཡོད་དོ་ཅོག་ལ་གཡོགས་ནས་མཚན་གྱི་དུས་ཟིན་ལ་ཉེ་ནའང་། དབུ་སྐྲ་དུང་ལྟར་དཀར་པོར་གྱུར་པའི་སྙན་ངག་པ། ད་དུང་ཚེ་ཕྱི་མའི་ཆེད་དུ་བསམ་ལོང་མེད་པར་ཅི་ཞིག་ལ་བསྒུགས་ཤིང་ཉན་ནས་འདུག།

ད་ལྟ་ལྷན་འཛོམས་མ་བྱུང་བའི་ན་གཞོ་ཕོ་མོའི་སེམས་པ་དེ་དག་མཉམ་དུ་འཛོམས་མིན་ལ་སེམས་ཚེགས་ཀྱིས་ཅེར་ཞིང་། ན་གཞོན་ཕོ་མོ་ཕན་ཚུན་མཛའ་གཅུགས་ཀྱི་བརྩེ་སེམས་འཁྲེང་ནའང་ཅི་ཞིག་གིས་བར་དུ་ཆོད་ཡོད་པས་ཁོང་ཚོའི་ཚབ་ཏུ་སྐད་ཆ་བཤད་སླད་དུ། སྙན་ངག་པའི་རོལ་དབྱངས་ལ་རེ་འབོད་ཞུ་མིན་ལ་ཉན་ནས་འདུག

གལ་ཏེ་ཁོ་རང་གི་ཚེ་སྲོག་གི་འཇུག་ངོགས་སུ་བསྡད་དེ། འཆི་བ་དང་ཚེ་ཕྱི་མ་ཁོ་ནར་སེམས་ལས་བྱས་ན། སུ་ཞིག་ནི་གནས་དེ་རུ་ཁོང་ཚོའི་བརྩེ་གདུང་གི་གླུ་གཞས་འཐག་མཁན་ཡིན། དེས་ན་སྙན་ངག་པ་རང་ངོས་ནས་བཤད་ན་འཆི་བ་ནི་མཛེས་སྡུག་ཅིག་དང་། ཡང་ན་རྨི་ལམ་ཙམ་ལས་ཅི་ཡང་ཡིན་མི་སྲིད།

ཚེ་སྲོག་གི་གསང་བ། སྙན་ངག་པའི་འགན་ཁྲི།

གོང་གི་སྙན་ངག་གི་ཚན་པ་གཉིས་པ།

མིའི་རིགས་ཀྱི་ཚེ་སྲོག་གི་གསང་བ་དངོས་གནས་པོ་དེ་མ་རྙེད་པ་དེ་སྲིད་དུ། མི་ནི་འཇིག་རྟེན་འདིའི་སྟེང་དུ་ཡུལ་ཡུལ་པོ། འཁྱམས་པོ་ཞིག་མིན་ནམ།

ད་ལྟ་ས་སྲོས་ཀྱི་སྐར་མ་ཡལ་ཞིང་། འཆི་བས་ཟིན་པའི་ཕུང་པོ་བསྲེགས་ཤུལ་གྱི་སྲེག་ཤིང་གི་དམར་མདངས་ཀྱང་ཁུ་སིམ་པའི་གཙང་འགྲམས་ན་ཁད་ཀྱིས་ཤི་སོང་ལ། ལྕེ་སྤྱང་གི་ཚོགས་ཀྱིས་ངུ་སྔངས་བྱེད་འགོ་བཙུགས། ཚེ་སྲོག་གི་གསང་བ་མ་རྙེད་པའི་ཁྱམས་པོ་རྣམས་རང་ཁྱིམ་དང་བྲལ་ནས་མཚན་ངོགས་སུ་འདུར་བ་ནི་འཇིག་རྟེན་གྱི་སྣང་ཚུལ་ཅི་འདྲའི་འཇིགས་སྐྲག་དང་། ཡུལ་ཡུལ་པོའི་སྣང་བརྙན་སྐྱ་པོ་ཞིག་རེད་ཨང་།

འོན་ཀྱང་ཚེ་སྲོག་གི་གསང་བ་རྙེད་པའི་དོན་དམ་པའི་སྙན་ངག་པ་འདི་ནི་མཚན་ངོགས་སུ་འདུར་བའི་འཁྱམས་པོ་ཚོའི་རྣ་བར་ཚེ་སྲོག་གི་གསང་བའི་རོལ་དབྱངས་ཤིག་དཀྲོལ་བའམ། ཚེ་སྲོག་གི་གསང་བའི་ལྐོག་ལབ་ཅིག་རྒྱག་པར་འཆི་བའི་འཇིགས་སྐྲག་ལ་ཅི་མི་སྙམ་པར་ས་སྲོས་ཀྱི་ཁ་ན་དལ་ལྷོད་དེར་བཞུགས་པ་འདིས། དོན་དམ་པའི་སྙན་ངག་པའི་འགན་ཁྲི་ནི་ཅི་ཞིག་ཡིན་པ་མཚོན་ནམ།

དགའ་སྐྱོའི་མིག་ཆུ། སྙན་ངག་པའི་འགན་ཁྲི།

གོང་གི་སྙན་ངག་ཚན་པ་གསུམ་པ།

དོན་དམ་པའི་སྙན་པ་འདིའི་ངོས་ནས་བཤད་ན། འཆི་བ་དང་ཚེ་ཕྱི་མ་ཞེས་པ་ནི་རྨི་ལམ་ཙམ་ཞིག་ཏུ་མཐོང་ཡོད་པས། ཁོའི་མགོ་སྐྲ་དཀར་པོར་གྱུར་པ་ནི་ཅང་མ་ལགས་སོ། །འོན་ཀྱང་སྙན་ངག་པའི་འགན་ཁྲི་ནི་གྲོང་གསེབ་ནང་གི་གཞོན་ཤོས་ལྟར་གཞོན་ནུ་ཡིན་ལ། རྒན་ཤོས་ལྟར་རྒན་པ་ཡང་ཡིན་ཏེ། རྒྱུ་མཚན་ནི་ཆ་མི་སྙོམས་པའི་འཇིག་རྟེན་འདིའི་ནང་འགྲོ་བ་མིའི་རིགས་ཁ་ཤས་ནི་བབ་ཆགས་ལ་ཡིད་དུ་འོང་བའི་འཛུམ་མདངས་ལྡན་ཅིང་། འགའ་ཞིག་ལ་གཡོ་ཟོལ་གྱི་མིག་མདངས་ལྡན། ལ་ལར་ཉིན་དཀར་མོའི་དུས་སུའང་མིག་ཆུ་ཡོད་ཅིང་། ལ་ཤས་ལ་ཚེ་སྲོག་གི་ཕ་རོལ་ན་མིག་ཆུ་བསྐུངས་ནས་ཡོད་པས། ཚེ་སྲོག་གི་གསང་བ་མ་རྙེད་པའི་ཁོང་ཚོ་ནི་འཁོར་བ་སྡུག་བསྔལ་གྱི་རང་བཞིན་ཞིག་ཏུ་གནས་འདུག

དེས་ན་དོན་དམ་པའི་སྙན་ངག་པ་འདིའི་སྨྱུག་རྩེ་ན་ཁོང་ཚོའི་དགའ་སྡུག་སྐྱོ་གསུམ་གྱི་མིག་ཆུ་བསགས་ཡོད་པས། སྙན་ངག་པས་རང་གར་དོར་འཕོད་དམ། ཁོང་ཚོར་མཁོ་བ་ནི་སྙན་ངག་པ་ཡིན་པས། སྙན་ངག་པ་ནི་ནམ་ནམ་ཞར་ཞར་ཡང་ཁོང་ཚོ་འཚོས་ནས་ཡོད།

མཇུག་གི་སྐད་ཆ།

རྒྱ་གར་གྱི་སྙན་ངག་པ་(Rabindranath Tagore)ལགས་ཀྱི་སྙན་ངག་ཚན་པ་འདི་ང་ཚོས་རགས་རིམ་ཞིག་བཀླགས་ཚར་སོང་།  དེས་ན་ཁྱོད་ཀྱིས་སོམས་དང་། དོན་དམ་པའི་སྙན་ངག་པ་ཞིག་གི་ལངས་ཕྱོགས་ཀྱི་ལྟ་བ་དང་། འགན་ཁྲི་ནི་ཅི་འདྲ་ཞིག་ཡིན་དགོས་སམ།

ད་ལན་ང་ཚོས་སྙན་ངག་འདིའི་སྐད་ཆའི་ཕྱི་ངོས་ཀྱི་ཚིག་རིས་ཙམ་བཀླགས་པ་རེད། སྙན་ངག་འདིའི་རྒྱབ་ལྗོངས་ཀྱི་སྐབས་དེའི་དུས་རབས་དང་སྤྱི་ཚོགས་ཀྱི་སྣང་བརྙན། སྙན་ངག་རང་ངོས་ཀྱི་མཛེས་པ། མཚོན་ཐབས་ཀྱི་སྒྱུ་རྩལ་ཐབས་ལམ། འགྲོ་བའི་མིའི་རིགས་ཀྱི་ལས་དབང་དགའ་སྐྱོ་ཆགས་གསུམ། འགྲོ་བ་མིའི་རིགས་ཀྱི་གཉུག་གཤིས། དེ་དང་དེས་མཚོན་པའི་སྙན་ངག་འདིའི་ཕ་རོལ་ན་མྱང་རྒྱུ་དང་། གོ་རྒྱུ་མང་པོ་ལྷག་ཡོད་པ་རེད།