རོ་ལངས་མི་རབས་དྲ་ཚིགས་རྩོམ་སྒྲིག་པས་སྤེལ།

ཀློག་པ་པོ་རྣམ་པར་ཞུ་རྒྱུར།

ང་ཚོ་རོ་ལངས་མི་རབས་ནི་སྟོང་ལོ་བཅུ་དགུའི་ནང་འཇིག་རྟེན་འདིར་རོ་ལངས་བརྒྱབས་པ་ཡིན། ཐོག་མའི་སྟ་གོན་དང་། གོམ་པ་དང་པོའི་གནས་སྐབས་འདིར་དེ་ཙམ་གྱིས་སྒྲ་འགྲིག་པོ་ཞིག་བྱུང་མེད་ཀྱང་སྲིད། གང་ལྟར་འདི་ནི་འགོ་བཙུགས་པ་ཡིན་པ་ལས། མཇུག་བསྡུས་པ་གཏན་ནས་མིན། ཡར་རྒྱས་ནི་མཐའ་མེད་སྟབས་ང་ཚོས་ཀྱང་དེའི་ལམ་བུར་སྙེག་པར་འབད་རྩོན་བྱེད་བཞིན་པའོ།།

ཐུགས་ལ་འདོགས་དགོས་པའི་དོན་ཚན་འགའ་ཞིག

༡༽ དྲ་ཚིགས་འདིའི་ནང་ད་ལྟའི་ཆར་ལེ་ཚན་ལ་ཆ་བཞག་ན། ང་ཚོའི་སྐོར། སྙན་ངག། བརྩམས་སྒྲུང་། རྩོམ་དཔྱད། གནས་ཚུལ་གསར་པ་བཅས་ལྔ་ཙམ་ལས་མ་གཏོགས་བཟོ་ཐུབ་མེད་ནའང་། རྗེས་སུ་བསྒྱུར་རྩོམ་དང་། ངོ་སྤྲོད། བཅར་འདྲི་སོགས་ལེ་ཚན་གང་མང་ཞིག་གྲ་སྒྲིག་བྱེད་རྩིས་ཡོད།

༢༽ ང་ཚོའི་དྲ་ཚིགས་འདིའི་ནང་རྩོམ་ཡིག་གསར་པ་དངོས་སུ་སྤེལ་བའི་དུས་ཚོད་ནི། བདུན་རེའི་གཟའ་མཇུག་འཛམ་གླིང་སྤྱིའི་འགྲོ་སྟངས་ལྟར་གྱི་གུང་སེང་ཉིན་གཉིས་ཀྱི་ནང་ཡིན།

༣༽ ང་ཚོའི་དྲ་ཚིགས་འདིའི་ནང་དགའ་སྐྱོ་ཆགས་སྡང་རང་བཞིན་ཅན་གྱི་རྩོམ་ཡིག་གབ་སྦས་དང་། དམར་རྗེན་ཅི་འདྲ་ཞིག་ཀྱང་སྤེལ་སྲིད་པས། ཀློག་པ་པོ་ཁྱོད་ཀྱིས་རྩོམ་རིག་ཅིག་ཡིན་པའི་ཆ་ནས་དང་། རྩོམ་པ་པོའི་ཚོར་བ་གློ་བུར་བ་ཞིག་གམ། རྩོམ་རིག་གི་མཛེས་པ་ཞིག་གི་ངོས་ནས་དང་།

སྨྲ་བརྗོད་རང་དབང་དང་སྨྱུག་རྩེ་གར་བསྒྱུར་ཡིན་པའི་འདུ་ཤེས་ཅན་གྱི་སྒོ་ནས་ཀློག་དགོས་པ་ལས། ཟོལ་ཟོག་དང་གཡོ་སྒྱུའི་འཇིག་རྟེན་རྫུས་མ་འདིའི་ནང་། ད་དུང་ཁྱོད་ཀྱིས་བདེན་པར་བཟུང་ནས་ཕུང་དཀྲུག་གིས་ཡང་དཀྲུག་བྱས་ཏེ་རྫུས་མའི་སྒང་ལ་རྫུས་མ་སྣོན་པ་རྒྱག་པ་ནི། ཁྱོད་རང་ངལ་བའི་རྒྱུ་ལས་མེད་པས། དེ་བས་ང་ཚོའི་དྲ་ཚིགས་ནང་བཀོད་པའི་རྩོམ་ཡིག་རྣམས་རྩོམ་རིག་གི་མཛེས་པ་ཞིག་ཡིན་པའི་ཆ་ནས་ཀློག་རོགས། གོ་བདེ་པོས་བཤད་ན་ཡ་མེད་ཚ་པོའི་ངང་ནས་ཀློག་རོགས། གལ་ཏེ་གོ་རྒྱུ་ཡོད་ན་ཁྱོད་རང་ལ་བློ་བསྐྱེད་ཐོབ་པ་ཡིན་ནོ།།

དྲ་ཚིགས་འདིའི་ཁ་བྱང་ནི་གཤལ་གསལ་དེ་ཡིན།

https://thapkhe.blogspot.com