གྲྭ་པ་བཟོ་བ།
སྐོར་ལམ་གྱི་མི་ཚོགས་རེ་རེའི་སྔོན་དུ་འགྲོ་ཅི་ཐུབ་ཀྱིས་བརྒྱུགས་ནས་ཁོང་ཚོ་གསུམ་ནམ་རྒྱུན་གྱི་ཇ་ཁང་དེར་སླེབས། ཇ་ཁང་གི་ཞབས་ཞུ་མ་དེས་ཀྱང་ནམ་རྒྱུན་དང་འདྲ་བར་ཚིག་ཇ་དཀར་ཡོལ་ཞབས་སྟེགས་ཅན་རེ་བཏེག་ནས་ཁོང་ཚོ་རེ་རེའི་མདུན་དུ་བཤམས།
གྲྭ་པ་མིག་ཤེལ་ཅན་དེས་དཀར་ཡོལ་བཏེག་ནས་ཚིག་ཇ་ཧུབ་གཅིག་བཏུངས་པས། ཚིག་ཇའི་རླངས་པ་དེ་ཁོའི་མིག་ཤེལ་ངོས་སུ་ཕོག་སྟེ་མཐོང་ལམ་རབ་རིབ་ཏུ་གྱུར། དེ་བས་ཁོས་མིག་ཤེལ་ཕུད་ནས་གཟན་གྱི་སྣེ་མོས་ཕྱིད་ཕྱིད་བཏང་བ་དང་ཡང་བསྐྱར་མིག་ཤེལ་གྱོན། སྐབས་དེར་ཁོང་ཚོ་གསུམ་ལ་རེ་ཞིག་སྨྲ་བ་ཅི་ཡང་མེད་པར་ཁུ་སིམ་མེར་ལུས།
མཚམས་ཤིག་ནས་གྲྭ་པ་མིག་ཤེལ་ཅན་དེས་ “དེང་སང་དགོན་སྡེ་ཁག་ལ་གྲྭ་རྒྱུན་ཉུང་དུ་ཕྱིན་ཡོད་པའི་གནས་ཚུལ་འདུག་གཱ།” སྐད་ཆ་དེ་ནི་ཁ་སང་དགོང་མོར་དགོན་བདག་ཅིག་དང་ཁོ་རང་གཉིས་ཀྱི་དབར་དུ་བྱུང་བའི་རྩོད་གླེང་ཞིག་ཡིན་པས། ད་ལན་ཁོས་གྲྭ་གྲོགས་གཞན་གཉིས་དེ་དང་ལྷན་དུ་བགྲོ་གླེང་ཞིག་བྱེད་དགོས་སྙམ།
གྲྭ་རྒན་ཀླད་དཀར་ཅན་དེས་བཤད་རྒྱུར། “རེད་རེད། དེ་དངོས་གནས་རེད། བྱས་ཙང་ངས་ད་ལོ་གྲྭ་ཕྲུག་གཉིས་དགོན་སྡེ་ཁག་ལ་ཞལ་འདེབས་ཀྱི་ཆེད་དུ་ཁྲིད་ཡོད།”
གྲྭ་རྒན་ཁ་སྤུ་ཅན་དེས། ཁོ་རང་གིས་ཁ་སྤུ་ནག་སོབ་སོབ་དེ་ལག་པས་བྱིལ་ཙམ་བྱས་རྗེས་གདོང་ལ་མཐོང་ཆུང་གི་ཉམས་ཤིག་མངོན་བཞིན་དུ་
“ཧེ་ཧེ་ གྲྭ་ཕྲུག་ཨེ། ཡག་ག་གཅིག་ཡིན་གྱི་མ་རེད། ཕ་མ་དེ་ཚོས་ཡག་ག་གཅིག་ག་པ་བཏང་གི་རེད།”
གྲྭ་རྒན་ཀླད་དཀར་ཅན་གྱིས་དྲི་རྒྱུར་ “ག་རེ་བྱས་ནས།”
གྲྭ་རྒན་ཁ་སྤུ་ཅན་དེས་ “གྲྭ་པ་དེ་ཚོ་ལ་ལྟོས་དང་། ཁ་ཤས་ནི་དྭ་ཕྲུག་རེད། ཁ་ཤས་ནི་ཕ་མ་དེ་ཚོས་འཚོ་གོས་ཀྱིས་སྐྱོང་མ་ཐུབ་ནས་དགོན་པར་བཏང་བཞག་པ་རེད།
གང་ལྟར་ཡག་ག་གཅིག་ཡོད་མ་རེད།”
ད་གཟོད་གྲྭ་རྒན་ཀླད་དཀར་ཅན་དང་གྲྭ་པ་མིག་ཤེལ་ཅན་གཉིས་ཀྱིས་ཁོ་དང་ཁ་རྩོད་རྒྱག་འགོ་བརྩམས་བྱུང་།
ཁོང་གཉིས་ནི་དེ་འདྲ་ཞིག་མིན་པའི་རྐྱེན་གྱིས་གྲྭ་རྒན་ཁ་སྤུ་ཅན་དེའི་སྐད་ཆ་རྣར་མ་ཤོང་བ་འདྲ།
“ཀུའི་…ཀུའི་……”ཁ་རྩོད་རྒྱག་སྒང་དེར་གྲྭ་པ་མིག་ཤེལ་ཅན་དེའི་ཁ་པར་ལས་ཁུ་བྱུག་གི་སྐད་སྒྲ་ཞིག་གྲག་པས་སྐད་འཕྲིན་ཞིག་སླེབས་པ་འདྲ། ཁོས་ཁ་པར་སྒོ་ཕྱེ་ནས་བལྟས་པར། དེ་ནི་ཁོ་རང་གི་ཕ་ཡུལ་གྱི་དཔོན་པོ་དེའི་སྐད་འཕྲིན་རེད།
མ་གཞི་དཔོན་པོ་དེ་ནི་ཁོའི་ཨ་ཁུ་ཡིན་ཁར་ད་བར་མ་ཐུག་ནས་ལོ་ངོ་བཅུ་གསུམ་ཙམ་ཕྱིན་ཟིན།
ད་ལན་དཔོན་པོ་དེ་ཡང་གཞུང་གི་ལས་དོན་ཆེད་དུ་རྒྱལ་ས་འདིར་སླེབས་ཡོད་པ་དང་སྟབས་ཁེལ་བས།
ཁོའི་ཨ་ཁུ་དཔོན་པོ་དེས་ཁོ་དང་ངེས་པར་དུ་ཐུག་འདོད་ཡོད་པའི་སྐད་འཕྲིན་ཅིག་བསྐུར་འདུག གྲྭ་པ་མིག་ཤེལ་ཅན་དེ་ཨ་ཁུ་དཔོན་པོ་ཐུག་འདོད་ཀྱིས་ཁ་རྩོད་རྒྱག་ལོང་མེད་པར་འཚབ་འཚུབ་ངང་ཇ་ཁང་དེ་ནས་གྲྭ་གྲོགས་གཞན་གཉིས་དེ་དང་ཁ་གྱེས།
ཁོ་དང་ཨ་ཁུ་དཔོན་པོ་གཉིས་ཁ་པར་བརྒྱུད་ནས་དུས་བཏབ་སྟེ་སྐོར་ལམ་གྱི་ཇ་ཁང་དཀྱུས་མ་ཞིག་ཏུ་ཐུག་འཕྲད་བྱས།
ཁོང་གཉིས་ཕན་ཚུན་ལ་འཚམས་འདྲི་ཞུ་རེས་བྱས་རྗེས་ཞབས་ཞུ་མར་བསུས་ཇ་ཕོར་པ་གང་རེ་མངགས། ཕན་ཚུན་གྱི་མཚམས་འདྲིའི་སྐད་ཆའི་རྗེས་སུ་རེ་ཞིག་ལ་ཁོང་གཉིས་ཁུ་སིམ་མེར་གྱུར།
གྲྭ་པ་མིག་ཤེལ་ཅན་དེའི་བསམ་པར་ཨ་ཁུ་ནི་ཕ་ཡུལ་གྱི་དཔོན་པོ་ཡིན་སྟབས།
ཁོའི་མདུན་སར་སྐད་ཆ་གང་བྱུང་བཤད་ན་མི་འོས་སྙམ་སྟེ། མིག་ཤེལ་དེ་སྣ་རྩེ་ནས་ཡར་འདེད་ཙམ་བྱས་ཏེ་སེམས་ཁུར་ཡོད་མདོག་གིས “ཨ་ཁུའི་ཕྲུ་གུ་དེ་ཚོ་སློབ་གྲྭར་བཏང་ཡོད་དམ།” དྲིས་པར། ཨ་ཁུ་དཔོན་པོས་འཛུམ་ཙམ་བྱེད་བཞིན་ “ཡོད་ལགས” ཟེར། གྲྭ་པ་མིག་ཤེལ་ཅན་དེས་ཤེས་ཡོན་པའི་ཉམས་ཤིག་གཏོད་དེ་གདོང་ལ་ཁེངས་ཉམས་ཤིག་དང་བཅས་ཕྲུ་གུ་སློབ་གྲྭར་གཏང་རྒྱུ་གལ་ཆེན་དང་།
ལྷག་ཏུ་དུས་རབས་འདིའི་ནང་ཤེས་ཡོན་མེད་ན་རྗེས་ལུས་ཡིན་ཚུལ་སྐོར་གྱི་སྐད་ཆ་མང་པོ་ཞིག་བཤད་རྗེས།
ཨ་ཁུ་དཔོན་པོས་ཅི་ཞིག་བཤད་ཡོང་བར་བསྒུགས། ཨ་ཁུས་ཇ་ཕོར་ལ་ཧུབ་གཅིག་བརྒྱབ་ནས་
“རེད་རེད། ཁྱེད་ཀྱིས་བཤད་པ་བདེན་པ་རེད། ད་ལྟ་ང་རང་གི་ཕྲུ་གུ་གཉིས་སློར་གྲྭར་བཏང་ཡོད་།
ཡིན་ནའང་ཕྲུ་གུ་ཆུང་བ་དེ་སློབ་གྲྭ་ལས་དགོངས་པ་ཞུས་ཏེ་གྲྭ་པ་བཟོ་དགོས་བསམས་ན་ཡང་། སློབ་གྲྭ་གཞུང་ནས་དགོངས་ཁྲོལ་ཐོབ་མ་བྱུང་།” ཟེར་བཞིན་གདོང་ལ་ཕངས་སེམས་ཀྱི་རྣམ་འགྱུར་ཞིག་མངོན་འོང་།
གྲྭ་པ་མིག་ཤེལ་ཅན་དེས་དཔྲལ་གཉེར་ཕྱོགས་གཅིག་ཏུ་བསྡུས་ཤིང་གཟབ་ནན་གྱི་ཉམས་ཤིག་གཏོད་དེ་ “ཕྲུ་གུ་སློབ་གྲྭ་ནས་བཏོན་ཏེ་གྲྭ་པ་ག་རེ་བྱས་ནས་བཟོ་དགོས་བྱུང་བ་རེད”
ཅེས་དྲིས་པར། “ཕྲུ་གུ་ཆེ་བ་དེ་སློབ་སྦྱོང་ལ་དོ་སྣང་དང་བརྩོན་འགྲུས་ཡོད་ཁར།
དབང་པོ་ཡང་ཐང་ཐང་ཡིན། མ་འོངས་པར་ཁོ་རང་གིས་མི་ཚེ་སྐྱེལ་ཐུབ་ས་རེད།” ཅེས་ཨ་ཁུ་དཔོན་པོའི་གདོང་ལ་འཛུམས་མདངས་ཤིག་མངོན།
ཡང་ཁོང་གིས་བཤད་རྒྱུར་ “ཡིན་ན་ཡང་ཕྲུ་གུ་ཆུང་བ་དེ། སྔོན་མ་ཆུང་དུས་ནས་གཟའ་ནད་ཕོག་སྟེ་དབང་པོ་བདེ་ཐང་མེད་ཁར།
ལས་ཀ་བྱ་རྒྱུར་ཡང་དཀའ་ལས་འདུག། མ་འོངས་པར་ཁོ་རང་སྒེར་གྱི་མི་ཚེ་ལ་དཀའ་ངལ་འབྱུང་ས་རེད།
དེ་བས་ད་ལྟ་ནས་ཁོ་རང་གྲྭ་པ་བཟོས་ནས་ཆོས་པ་ཞིག་བྱས་ན། མ་འོངས་པར་ཁོ་རང་གི་མི་ཚེའི་ནང་དཀའ་ངལ་འབྱུང་ས་མ་རེད།”
ཟེར་བཞིན་ཨ་ཁུ་དཔོན་པོའི་གདོང་ལ་གཟབ་ནན་དང་སྐྱོ་ཉམས་འདྲེས་མ་ཞིག་མངོན་འོང་།
མཚམས་དེར་གྲྭ་པ་མིག་ཤེལ་ཅན་གྱི་སེམས་ལ་ད་གིན་སྔོན་གྱི་ཁ་རྩོད་དེ་དྲན་པ་དང་ཆབས་ཅིག
རེ་ཞིག་ལ་ཨ་ཁུ་དཔོན་པོར་ཅི་ཞིག་ཤོད་དགོས་པའང་མ་ཤེས་པར་ངོ་གནོང་ཞིང་མགོ་བོ་བསྒུར་ནས་བསྡད།
ཁོས་བསམ་བློ་བཏང་མཐར་ཏག་ཏག་ལ་སྐད་ཆ་ཞིག་དྲན་བྱུང་།
ཁོས་མིག་ཤེལ་སྣ་རྩེ་ནས་ཡར་འདེད་ཙམ་བྱས་ཤིང་མགྲིན་པ་གཟེངས་སུ་བཏེག་ནས་གྲེ་བ་བསལ་ཏེ་བཤད་རྒྱུར་
“ཕྲུ་གུ་དེ་མ་འོངས་པར་ཁོ་རང་སྒེར་གཅིག་པུའི་མི་ཚེ་ཡང་སྐྱེལ་མི་ཐུབ་པའི་དཀའ་ངལ་འབྱུང་ན།
ཁོ་གྲྭ་པ་བཟོས་ཏེ་ཆོས་པ་བྱས་ན་ཡོང་ཐབས་ཡོད་མ་རེད། ངེད་ཆོས་པ་ཚོ་ནི་རང་གཅིག་པུ་མི་ཚེ་སྐྱེལ་བ་མིན་པར།
སེམས་ཅན་ཐམས་ཅད་ཀྱི་དོན་དུ་རྒྱུག་དགོས་རེད།”
“ཧ་ཧ……….”
ཨ་ཁུ་དཔོན་པོ་ཚད་མེད་ཅིག་བགད་བྱུང་།
དགོད་ཀྱིན་དགོད་ཀྱིན་ཁོའི་ངོ་མདོག་དམར་པོར་གྱུར།
No comments:
Post a Comment