བོད་ཀྱི་སྲོལ་རྒྱུན་སྙན་ངག་ཐུན་མོང་མིན་པའི་ཚད་མཐོ་ཤོས་དེ་

ཆོས་པ་སྙན་ངག་པས་བཟུང་ཡོད།

བོད་ཀྱི་སྲོལ་རྒྱུན་སྙན་ངག་པ་ལ་བལྟས་ན་རིགས་གཉིས་སུ་དགར་ཆོག་སྟེ། ཆོས་པ་དང་འཇིག་རྟེན་མི་སྐྱ་གཉིས་རེད། དེས་ན་འཇིག་རྟེན་མི་སྐྱས་བྲིས་པའི་སྲོལ་རྒྱུན་སྙན་ངག་དེ་ཆོས་པ་སྙན་ངག་པས་གོ་ཐུབ་ནའང་། ཆོས་པ་སྙན་ངག་པའི་སྙན་ངག་ཐུན་མོང་མིན་པ་སྟེ་སངས་རྒྱས་ཆོས་ལུགས་ཀྱི་ལྟ་གྲུབ་དང་སྦྱར་ཞིང་། དེའི་ལྟ་གྲུབ་མཚོན་བྱེད་ཀྱི་མདོ་སྔགས་སོ་སོའི་ཆོས་ཚིག་བེད་སྤྱད་ནས་བྲིས་པའི་སྙན་ངག་གོ་དཀའ་བའི་རིགས་རྣམས་ཆོས་པ་སྙན་ངག་པ་ཁོ་ནས་གོ་ཐུབ་པ་ལས། གཞན་སུ་ཞིག་གིས་ཀྱང་གོ་ཐུབ་པ་མ་རེད།

དེས་ན་སངས་རྒྱས་ཆོས་ལུགས་ཀྱི་ལྟ་གྲུབ་དང་སྦྱར་ཞིང་ཆོས་ལུགས་དེའི་ཆོས་ཚིག་བེད་སྤྱད་ནས་བྲིས་པའི་སྙན་ངག་ནི་བོད་ཀྱི་སྲོལ་རྒྱུན་སྙན་ངག་ཐུན་མོང་མིན་པ་ཡིན་ལ། དེ་འདྲའི་ལྟ་གྲུབ་དང་ཆོས་ཚིག་གཉིས་ཀ་བེད་སྤྱད་ནས་བྲིས་པའི་སྙན་ངག་ནི་འཛམ་གླིང་རྩོམ་རིག་ལོ་རྒྱུས་ཐོག་གཅིག་ཁོ་ནས་ལས་གཉིས་པ་ཞིག་མེད། མ་ཟད་བོད་ཀྱི་ཐུན་མོང་མིན་པའི་སྙན་ངག་ཅིག་སྟོན་ཟེར་བའི་དབང་དུ་བཏང་ན། དེ་ཁོ་ན་ལས་གཞན་སྟོན་དུ་མེད་པ་རེད།  དམངས་གླུ་རྣམས་ཀྱང་དེ་གཉིས་སུ་ཁ་ཚོན་ཆོད་ཡོད། གཞན་སྙན་ངག་ལྷག་མ་རྣམས་ནི་ནང་དོན་དང་རྣམ་པ་གཉིས་ཀའི་ཐད་ནས་དནྜིའི་མེ་ལོང་མ་དང་། ནུབ་ལུགས་དེང་རབས་རིང་ལུགས་ཀྱི་འདྲ་པར་ཙམ་རེད།

ང་ཚོས་བསམ་བློ་ཞིབ་ཏུ་བཏང་ན་ད་ཡོད་དུས་རབས་ནང་དེའི་འདྲའི་ཆོས་པའི་སྙན་ངག་གསར་པ་ཞིག་མཐོང་རྒྱུ་འདུག་གམ། དེ་མེད་པའི་རྒྱུ་མཚན་ནི་ཆོས་པ་སྙན་ངག་པ་རྒྱུན་ཆད་ཚར་བ་རེད། ད་ལྟ་ང་ཚོ་ལ་ཡོད་པ་ནི་དུས་རབས་ཉེར་གཅིག་སྔོན་གྱི་ཆོས་པའི་སྙན་ངག་ཁོ་ན་ལས་མེད་པ་རེད།  བོད་ཀྱི་སྲོལ་རྒྱུན་སྙན་ངག་ཐུན་མོང་མིན་པའི་ཆོས་པ་སྙན་ངག་པ་དུས་རབས་ཉི་ཤུའི་ནང་ན་མཇུག་སྡོམ་བརྒྱབས་ཟིན་ཚར་འདུག།

དེས་ན་ངས་འདིར་བཤད་འདོད་པ་ནི། བོད་ཀྱི་སྲོལ་རྒྱུན་སྙན་ངག་ཐུན་མོང་མིན་པའི་ཚད་མཐོ་ཤོས་དེ་ཆོས་པ་སྙན་ངག་པས་བཟུང་ཡོད་པ་ལས། འཇིག་རྟེན་མི་སྐྱས་བཟུང་མེད་ཟེར་བ་ཡིན།

ད་དུང་ཁྱེད་ཚོ་ཡིད་མ་ཆེས་ན། དུས་རབས་ཉི་ཤུའི་སྔོན་དུ་བོད་ཀྱི་ཆོས་བརྒྱུད་ཆེན་པོ་སོ་སོའི་ལྷ་ཀླུ་གཞི་བདག། ཆོས་སྐྱོང་སྲུང་མ་སོགས་ལ་བསྟོད་པའི་སྙན་ངག་རྣམས་ཏེ། དེང་སང་གི་བཤད་སྟངས་ལྟར་བྱས་ན་གསོལ་ཁ་ཟེར་བ་རེད། དེ་ལྟ་བུའི་ཆོས་པའི་སྙན་ངག་ཚད་མཐོན་པོ་དེ་འདྲ་ཆོས་པས་གོ་རྒྱུ་ལས། འཇིག་རྟེན་མི་སྐྱས་གོ་རྒྱུ་མ་རེད།

ངས་གོང་དུ་བཤད་ཟིན་པ་ལྟར་དེ་ལྟའི་སྙན་ངག་ནི་དུས་རབས་ཉི་ཤུའི་ནང་མཇུག་བསྡོམས་བརྒྱབས་ཟིན་པ་དངོས་ཡོད་ལ་སྙོན་དུ་མེད་པ་ཡིན་ཏེ། དེང་སང་གསོལ་ཁ་སྙིང་པའི་ལག་ཆ་ཁྱེར་ནས་སྒོར་མོ་བསྡུ་རུབ་བྱེད་པ་ལས། དེ་ལྟ་བུའི་ཆོས་པའི་སྙན་ངག་གམ་གསོལ་ཁ་ཞིག་གསར་དུ་རྩོམ་མཁན་མེད་པ་རེད།

སྐད་ཆ་འདི་དག་ལས་ནམ་རྒྱུན་བོད་ཀྱི་རྩོམ་རིག་ལོ་རྒྱུས་ལ་དཔྱད་པ་བྱེད་ཀྱི་ཡིན་ཟེར་མཁན་ཚོར་གོ་རྒྱུ་དང་མྱོང་རྒྱུ་ཡོད་སྲིད་པ་རེད། སྐད་ཡིག་དང་རིག་གཞུང་སྐྱོབ་དགོས་ཟེར་མཁན་གྱི་གད་སྙིགས་སྒྲུག་མཁན་ཚོར་ཅི་ཞིག་དྲན་དུ་འཇུག་རྒྱུ་རེད། སྙན་ངག་པ་ཡིན་ཟེར་མཁན་ཚོར་བློ་ངོར་དྲི་རྟགས་འཆར་རྒྱུ་རེད།

གཤམ་དུ་གངས་རིའི་ལྗོངས་ཀྱི་ཆོས་པ་སྙན་ངག་པ་ཆེན་པོ་ཀུན་མཁྱེན་རིག་འཛིན་འཇིགས་མེད་གླིང་པའི་སྙན་ངག་གཅིག་ཁྱེད་རྣམ་པའི་སྤྱན་སྔར་བསྟར་ཡོད། དགྱེས་གཟིགས་གནང་ཆོག།

༠༢/༠༢/༢༠༡༩/

ཀློང་ཆེན་སྙིང་གི་ཐིག་ལེ་ལས་བསྟན་སྲུང་དམ་ཅན་རྒྱ་མཚོའི་རུ་མཚོན་མངའ་གསོལ།

སྐྱེ་མེད་རྡོ་རྗེ་དབྱིངས་ཀྱི་ཡུམ་ཆེན་པོ།།

འགག་མེད་དཔལ་ལྡན་རང་བྱུང་རྒྱལ་མོ་དང་།།

དཔལ་མགོན་སྡེ་ལྔ་ལྕམ་དྲལ་བཀའ་སྡོད་བཅས།།

ཡེ་ཤེས་དབྱིངས་སུ་དབུ་འཕང་བསྟོད་པར་བགྱི།།

རྣམ་པ་ཀུན་གྱི་མཆོག་ལྡན་སྟོང་པའི་གཟུགས།།

ཀུན་ཁྱབ་བདེ་ཆེན་ངང་དུ་རོ་གཅིག་ཀྱང་།།

མ་རིག་འཛིན་པའི་ལས་རླུང་གིས་སྤྲུལ་པའི།།

གཡར་དམ་གཉན་པོ་ཆོས་ཀྱི་དབྱིངས་སུ་བསྲེ།།

འདས་པའི་རྣམ་པར་རྟོག་པ་ཡོད་དོ་ཅོག །

སྔ་བཅོལ་ལེགས་པའི་གཏང་རག་གཉན་པོ་སྤེལ།།

མ་འོངས་རྣམ་པར་རྟོག་པ་གནས་བསྒྱུར་ནས།།

ད་བཅོལ་ལེགས་པའི་ཞུ་བ་གཅིག་ཏུ་འབུལ།།

ཆད་པའི་གཞུང་གཅིག་བདག་གིས་མི་སྲོང་རྒྱུ།།

ཆད་ལས་དོན་འབྱུང་དོན་ལས་མ་གཡེལ་ཅིག །

བཅོལ་བའི་ཕྲིན་ལས་ཁྱོད་ཀྱིས་མི་མཛད་རྒྱུ།།

ཕྲིན་ལས་དོན་དུ་གཟུགས་སྐུར་བཞེངས་ལ་དགོངས།།

དབུ་འཕང་གཉན་པོ་དེ་རིང་མི་བསྟོད་རྒྱུ།།

ཕྱོགས་ལས་རྣམ་རྒྱལ་བརྟུལ་ཞུགས་འཛིན་པའི་ཕྱིར།།

ལྷུན་པོའི་སྤོ་དང་ཉི་ཟླའི་བཀྲག་མདངས་ཀྱང་།།

རྔམས་བརྗིད་ཡོན་ཏན་འབར་བའི་དཔྱིད་དུ་སྤུངས།།

སྙིགས་མ་ལྔ་ཡི་ཡང་མཐར་ལྟུང་བ་རྣམས།།

ནད་མཚོན་དམག་འཁྲུག་མུ་གེས་མནར་བའི་ཚེ།།

སྐྱབས་འོས་དཀོན་མཆོག་རིན་ཆེན་རྣམ་པ་གསུམ།།

དམ་ཅན་ཆོས་སྲུང་རྒྱ་མཚོར་བཞེངས་ལ་འབོད།།

ཞི་བ་ཕྱོགས་གཅིག་མྱ་ངན་མི་འདའ་བར།།

སློབ་པ་ལམ་གྱི་དམ་བཅའི་མཐར་ཐུག་ཕྱིར།།

སྟོང་ཉིད་དབྱིངས་ལས་སྙིང་རྗེའི་སྒྱུ་ཐབས་གར།།

རྣམ་བཞི་ཕྲིན་ལས་རོལ་མོར་མངའ་གསོལ་ལོ།།

རྟ་གདོང་མེ་ལྕེ་འབར་བའི་མུ་ཁྱུད་ནང་།།

ལས་དབང་བསོད་ནམས་རླུང་རྟ་དར་དྲགས་པའི།།

དཔུང་ཚོགས་ཡན་ལག་བཞི་པའི་རྩིབས་རྣོན་གྱིས།།

གཞན་སྡེའི་བརྟན་པ་འཕྲོག་པར་མངའ་གསོལ་ལོ།།

ཀུན་འབྱུང་འཁོར་བའི་རྒྱུ་འབྲས་རྣམ་རྟོག་གིས།།

གཞན་དབང་ཉིད་དུ་ཡོངས་ཡེར་མ་བཟུང་ཡང་།།

གང་ལ་གསོལ་བ་བཏབ་ན་ཡིད་བཞིན་ནོར།།

འབད་མེད་འགྲུབ་པའི་ནོར་བུར་མངའ་གསོལ་ལོ།།

རང་སྡེ་བསྲུང་ལ་ཤིན་ཏུ་མཛངས་བཞིན་དུ།།

གཞན་སྡེ་དབང་བྱེད་སྒྱུ་རྩལ་ལ་གོམས་པས།།

ཐབས་ལ་མཁས་པའི་ཤེས་རབ་མིག་ཡངས་མས།།

ཁམས་གསུམ་དབང་བྱེད་བཙུན་མོར་མངའ་གསོལ་ལོ།།

འདུ་འཛིའི་གནས་ཀྱང་བསྡུ་བའི་དངོས་པོ་དང་།།

ཚངས་གནས་བཞི་ཡི་དོན་ལ་སྦྱོར་བྱེད་ཅིང་།།

འབྱོར་ཞིང་རྒྱས་ལ་སྲིད་སྡེ་གསུང་མཁས་པའི།།

ཁྱིམ་བདག་རིན་ཆེན་མཆོག་ཏུ་མངའ་གསོལ་ལོ།།

རྟག་ཆད་དོན་ལ་སེམས་པའི་མུ་སྟེགས་དང་།།

འཚེ་བ་ཆོས་སུ་སྨྲ་བའི་ཀླ་ཀློའི་དཔུང་།།

ཐེག་ཆེན་ལུས་སྟོབས་རྒྱས་པའི་སྣ་ཞགས་ཀྱི།།

རལ་གྲིས་གཅོད་པའི་གླང་པོར་མངའ་གསོལ་ལོ།།

བསྐུལ་སར་ཡུད་ཀྱིས་ཕྱིན་པའི་མགྱོགས་པའི་བང་།།

རྦད་སར་ཐོགས་སྡུག་མེད་པའི་རླུང་གི་ཤུགས།།

ཕ་རོལ་རི་རབ་ཡིན་ཡང་རྫུ་འཕྲུལ་གྱིས།།

བརླག་བྱེད་རྟ་མཆོག་ཆེན་པོར་མངའ་གསོལ་ལོ།།

ལེགས་ཉེས་སྟངས་འཛིན་བདག་པོ་ཁྱོད་རྣམས་ནི།།

རྫུ་འཕྲུལ་རྐང་པ་བཞི་ལ་མཆོག་ཐོབ་ཅིང་།།

སྟོབས་བཅུ་མི་འཇིགས་རྣམ་བཞིའི་རྩལ་རྫོགས་པའི།།

དགྲ་སྡེ་འཇོམས་པའི་དམག་དཔོན་ཆེན་པོར་མཛོད།།

ཁྱད་པར་རང་སྲིད་འབྱོར་པས་མི་ངོམས་པར།།

གཞན་སྡེ་བཟའ་བའི་ལྷ་མིན་འཇུག་པ་ཅན།།

བྱེད་པ་རྒྱུ་མཐུན་མཚོན་ཆའི་རྣོ་དབལ་རྩེར།།

རང་སྲོག་རང་གིས་འཕྲོག་པར་མངའ་གསོལ་ལོ།།

གང་ལ་སྲུང་སྐྱོབས་བྱེད་པའི་ལྷ་སྲུང་དང་།།

མཛའ་གཅུགས་དམ་བཅའི་རི་མོ་ཉེར་བསྲུབས་ལ།།

བསྟན་འགྲོའི་ཕན་བདེ་བཤིག་པའི་མདུན་གྲོས་དཔུང་།།

ནང་དབྱེན་དམེ་འཁྲུག་སྦྱོར་བས་སྤ་ཀོང་ཤིག །

རིགས་གསུམ་མགོན་པོ་མེས་དབོན་རྣམ་གསུམ་གྱིས།།

རྒྱལ་བསྟན་གངས་རིར་དྲངས་པ་ཆུད་གསན་ནས།།

དགེ་བཅུའི་ཁྲིམས་ཀྱི་མུ་ཁྱུད་བཤིག་པ་རྣམས།།

དོན་སྙིང་ལྐོག་མར་འབྱིན་པར་མངའ་གསོལ་ལོ།།

འཇིག་རྟེན་ལས་ཀྱིས་སྤྲུལ་པའི་གཞན་དབང་ལ།།

ཕྱ་དང་དབང་ཕྱུག་རང་དབང་ཡིན་ཟེར་ན།།

བདེན་པ་གཉིས་དང་དེ་ཡི་བསྟན་སྲུང་ལ།།

རྟེན་གོམས་བྱས་པའི་འབྲས་བུ་གཡེལ་ལམ་ཅི།།

ཆོས་ཀྱི་སྐུ་ནི་དུས་གསུམ་སྐྱེ་འགག་མེད།།

ལོངས་སྤྱོད་རྫོགས་ལས་རྣམ་སྤྲུལ་ཆོས་སྐྱོང་རྣམས།།

དམ་ཅན་ཉིད་ཕྱིར་དམ་ཚིག་དང་བཞེས་ལ།།

ལྔ་བདོའི་འགྲོ་འདིའི་སྲུང་སྐྱོབ་དུས་ལ་བབ།།

མིག་འཕྲུལ་ལས་ཀྱང་མྱུར་བའི་འཇིག་རྟེན་གྱི།།

རྒུད་པ་སྣ་ཚོགས་དམ་ཅན་ཆོས་སྲུང་མཐུས།།

བསྲུང་ཞིང་ཁྱད་པར་བདག་ཅག་ཡོན་མཆོད་ལ།།

ལུས་དང་གྲིབ་བཞིན་འགྲོགས་ནས་གྲོགས་དན་མཛོད།།

གཞིས་སུ་འདུག་ན་རྫོགས་ལྡན་དགའ་སྟོན་སྤེལ།།

བྱེས་སུ་གཅན་འཕྲང་ཆོམ་རྐུན་ཁ་ཆར་སྲུང་།།

དགྲ་དང་འགྱེད་ན་དཔའ་རྟགས་རུ་མཚོན་འཕྱོར།།

ཕྱོགས་ལས་རྣམ་རྒྱལ་བཀྲ་ཤིས་བདེ་ལེགས་མཛོད།།

ཅེས་པའང་མདའ་དཔོན་ཕ་ལྷའི་ངོར་རྫོགས་ཆེན་པ་འཇིགས་མེད་གླིང་པས་སོ།།