༠

མཚན་མོའི་གོམ་སྒྲར་ཉན་པའི་རྣ་བ་ལ།།

གསེང་རས་ནག་པོའི་ཕག་གི་མིག་ཟུང་ཞིག།

དལ་གཅིག་ཡུད་ཙམ་སྣང་བའི་ཁེར་འགྲོ་དེ།།

མུན་པའི་སྐེ་ཐག་ཐོགས་པའི་འདྲེ་མོ་རེད།།

གནམ་ས་ཆ་ལང་རྡེབ་པའི་ཀྱི་ཧུད་དེ།།

སྤྲིན་པ་ཆུ་ལ་བསྐུར་བའི་སྔ་ལྟས་ཡིན།།

དགུང་གི་མེ་དཔུང་དྲོ་བའི་འདྲེ་གཏམ་ལ།

སྲིན་མོ་རལ་པ་ཅན་གྱི་བླ་ཡང་འཁྱམས།།

ཆུ་ཁོལ་གདུས་པའི་ངར་ལྕགས་རྣོན་པོ་དེ།།

དར་ལྕེ་ཟད་པོའི་རྣམ་ཤེས་རླུང་བུ་ཡིན།།

གངས་དང་སེང་གེ་འཐབས་པའི་ཁྲག་རལ་དེ།།

ཀློང་གི་ཆུ་བོ་བྲུག་པའི་རླབས་ཟིལ་རེད།།

ཀེང་རུས་རུམ་དུ་བཅུག་པའི་ཡ་ལད་ལ།།

བྱེ་གཟེགས་རླུང་ལ་སྤུར་པའི་ཐམ་ག་ཞིག།

ཁྲོམས་རྟགས་གཟུགས་རིས་ཕབ་པའི་དཔྲལ་མགོ་དེ།།

ཁོང་གི་ལུད་པ་ལུད་པའི་ཧག་སྒྲ་རེད།།

Febaruary/8/ 2019

(ཞར་བཀོད་གཅིག)

སྨྱུག་ཐོགས་ཅལ་འདྲོགས་པ།

དགོད་ཅིག་ཤོར་ན་མཉམ་དུ་དགོད།།

ངུ་གཅིག་ཤོར་ན་ལྷན་དུ་ངུ།།

མིག་ཆུ་མེད་པའི་ངུ་ངག་མང་།།

འཛུམ་དཀར་མེད་པའི་དགོད་སྒྲ་མང་།།

གཅིག་གིས་བསྟོད་ན་གཞན་དེས་ཀྱང་།།

གཞན་གྱིས་སྨད་ན་ཁྱོད་ཀྱིས་ཀྱང་།།

བསྟོད་ཡུལ་མེད་པའི་སྒྲོ་གཅིག་བཏགས།།

སྨད་མི་དགོས་པའི་སྐྱོན་གཅིག་འཚོལ།།

ཁོ་ཡིས་འཇོན་རབས་ཁྱོད་ཀྱིས་འུད།

ཁྱོད་ཀྱི་ཁ་བྱང་གཞན་གྱིས་འཚོང་།།

ཁྱི་སྤྱང་ངན་འགྲེལ་བསྡེབས་པ་ཡིས།།

འཇིག་རྟེན་རྨོངས་པ་འཁྲུལ་དུ་འཇུག།

1/25/2019