སེམས་པ་དགུན་གྱི་རླུང་བུ་རེད།

དགུང་གི་ཨ་སྔོན་སྔོ་ཞིང་སངས་ནའང།།

ལྗོན་པ་སྐམས་རེངས་ལྟ་བུའི་སེམས་པ་འདི།།

བཙག་དང་ལྷགས་པས་དེད་པའི་ཨུ་ཤུ་ཡིས།།

ཁེར་བུའི་སྟོང་ཁམས་རིང་མོ་བསྲིངས་ནས་ཡོང་།།

མགོ་བོ་གནམ་ལ་དགྱེ་བའི་ཐོང་ག་ནས།།

འདབ་ལོ་སེར་པོ་གདོང་ལ་ལྷུང་དུས་སུ།།

ཁོག་གི་སྙིང་ཁམས་འདར་ནས་ཡོང་ནའང་།།

མཛེས་སྡུག་ཟེར་བའི་སེམས་གསོ་ལྷག་མ་ཞིག།།

རྒྱ་ཕིབས་སེར་མདངས་འཕྲོ་བ་སྔར་བཞིན་རེད།།

དྲིལ་བུའི་ཅོང་བརྡ་གྲག་པ་དེ་རིང་ཡང་།།

དར་ལྕེ་ཟད་པོའི་བྲེལ་བ་འཚུབ་ནའང་།།

རྒྱང་ལ་མཁྲེང་བའི་གནས་ལུགས་ཤོད་དུ་མེད།།

2018/01/14 ཉིན་དགུང་རང་ཤག་ཏུ་བྲིས།