ཁ་བ་དང་ཉེ་བར་བཅར་བ། སྙན་ངག་རྐང་གཅིག

ཁ་བ་དང་ཉེ་བར་བཅར་བ།

ཁ་སང་གི་ཁ་པར་བརྒྱུད་ནས།

ཕ་ཡུལ་ལ་ཁ་བབས་བྱུང་ཟེར།

དུས་ཚིགས་འདི་ནི་ང་རང་ཕ་ཡུལ་དང་ཉེ་བར་བཅར་བ་ཡིན་ཕྱིར།

ཁ་བ་དང་ཡང་ཉེ་བར་བཅར་བ་ལོས་ཡིན།

རྡོ་བའི་ཁྲོད་ཀྱི་ལམ་ཀྱོག་དང་།

བཞུར་རྒྱུན་དྲག་པའི་གཙང་ཆུ་དྭངས་མོ།

ཁ་བའི་ཐོད་ལ་བཅིངས་པའི་རི་བོའི་འདབས་རོལ་གྱི་སོམ་སྡོང་གི་ནགས་ཚལ།

ལོ་ངོ་བཅུ་ཕྲག་གཅིག་གི་ཡར་སྔོན་གྱི་ཁ་བ་དང་འདྲ་བྱུང་།

ཞོགས་པའི་ཁང་སྟེང་གི་དུད་སྤྲིན་གྱ་གྱུ་བར་སྣང་ལ་འཕྱོ་ཞིང་།

དགོངས་རྒའི་ནུབ་རིའི་གྲིབ་ནག་ཁ་བ་ལ་གཡོགས་དུས།

ཕ་རོལ་གྱི་རི་མགོར་བབས་པའི་ཁ་བ་དེ།

ནམ་ཞིག་ལ་གྲམ་ཐང་དུ་འབབ་པར་ཅེར་ནའང་།

ཁ་སང་དང་དེ་རིང་། སང་ཉིན་དང་གནངས་ཉིན།

ཞིང་གྲོང་གི་བུ་མོ་དེ་ཚོའི་མིག་མདངས་དང་འདྲ་བར།

དད་པ་དང་ཡིད་སྨོན་ཙམ་ཞིག་ཡིན་ནམ།

2018 /03 /23བྱ་རུང་ཁ་ཤོར་ཉེ་འདབས་སུ་བྲིས།