{ཁད།} (ཞར་བཀོད་ཚན་པ་གཅིག)

ཁད།

(ཞར་བཀོད་ཚན་པ་གཅིག)

དགུན་གྱི་ལྷགས་རླུང་འུར་གྱིས་གཡུག།།

མཁུར་མགོ་ཟུང་ཡང་འཁྱག་ལ་ཁད།།

སེམས་པ་རྡོ་བར་འགྱུར་དུས་འདིར།།

གྲང་ཟུག་ཅིག་ཀྱང་རྒྱག་ལ་ཁད།།

གནམ་ངོ་ངུ་བའི་ལྔ་ལྟས་སུ།།

འཛུམ་བག་མེད་པའི་ངོ་གདོང་མང་།།

ཙག་གི་སྦྲིད་པའི་སྙིང་ཤ་ཡང་།།

འདར་གསིག་ཅིག་ཀྱང་རྒྱག་ལ་ཁད།།

སྨྲ་བ་མེད་པའི་ད་ཞག་ལ།།

ལྗིད་ཅིང་ནོན་པའི་རྡོག་ཁྲེས་ཤིག །

མགོ་བོ་དུད་པའི་མི་ཚོགས་ཁྲོད།།

མིག་ཟུང་རད་པ་འཁྱག་ལ་ཁད།།

༢༠༡༩

ཞོགས་པའི་འཇམ་ཆར་བསིལ་མ།

ཐག་རིང་དུ་བསྲིངས་པའི་རྒྱ་ལམ་སྟེང་།

ང་ཁོ་ན་འགྲེངས་ནས་ཡོད།

ད་ལྟ།

ཞོགས་པའི་འཇམ་ཆར་སིབ་སིབ་ཅིག་འབབ་བཞིན་ཡོད་ནའང་།

ལམ་ཟུར་གྱི་ལྗོན་ཤིང་ཚོགས་ནི་སྨྲ་བ་མེད་པར་ཀྲོང་ངེར་འགྲེངས་ཤིང་།

རྒུན་འབུ་འཐུ་བའི་བྱེའུ་ཚོགས་ནི་སྔ་ས་ནས་འཕུར་སོང་།

མཐོང་ལམ་ནི་སྨུག་པ་ལང་ལོང་ཞིག་གིས་བསྒྲིབས་ནའང་།

ཟིལ་པས་དུད་པའི་རྩྭ་ལྗང་ཕོན་པོ་ནི་སྔར་བཞིན་ཁུ་སིམ་མེར་རེད།

༢༠༡༩ རྒྱ་ལམ་ཞིག་གི་སྟེང་དུ་བྲིས།

{མུན་པར་འཁྱུད་པ།}

མུན་པར་འཁྱུད་པ།

མུན་པ་གདངས་སུ་བཀུག་པའི་དོ་ནུབ་འདིར།།

དབྱངས་གསལ་རྡོ་ལ་རྡེབ་པའི་གྲིབ་གཟུགས་ཁྱོད།།

འཇག་མ་ཤུགས་གླུ་ལེན་པའི་འོབས་དོང་ན།།

གློག་སྒྲོན་མུན་པར་འཁྱུད་པའི་སྣེ་མོ་རེད།།

ཚེ་སྲོག་རྡུལ་དུ་བརླགས་པའི་འཐབ་རར་ཡང་།།

སུག་པ་མེ་རུ་བསྒྲོན་པའི་དཀར་ངོགས་ནས།།

མི་སྐད་ཐུར་དུ་དུད་པའི་ཁུ་ཚུར་དེ།།

སྣང་བ་ཡུད་ཅིག་ཡིན་འགྲོ་ཐལ་ལེ་བ།།

གོམ་སྒྲས་རྣ་བ་བཀད་པའི་གཅེར་བུ་བ།།

ཁྱོར་བ་གནམ་ལ་བཟེད་པའི་ཐན་ལྟས་དེ།།

བྲང་རུས་འཁྱག་ལ་འབྱར་བའི་ཀྱེ་ཧུད་ཅིག།།

ལྷང་ལ་ཕུད་འདི་ཁྱོད་ཀྱི་སྐད་པ་རེད།།

2019

{ལམ་གྱི་གོལ་བ།}

ལམ་གྱི་གོལ་བ།

ཁྱི་སྤྱང་ཀུ་ཅོ་རྒྱག་པའི་དོ་ནུབ་འདིར།།

དཔྲལ་མགོ་ཀོ་བས་གཡོགས་པའི་འདྲེ་མིག་དེ།།

ཚུར་ཚུར་ནུར་བའི་སྡར་མའི་མགོ་རུས་ཤིག།

ཐང་གི་བྱེ་མར་བརྡལ་བའི་གཏམ་རྒྱུད་བྲིས།།

སྨག་གི་རྨི་ལམ་ཁྲོད་ཀྱི་ཟིར་ཟིར་པོ།།

འུག་པས་ཧབ་ཆ་རྒྱག་པའི་མཚན་གཞུང་འདིར།།

ཁྱི་གུ་མཇུག་མ་གློད་པའི་སྔ་ལྟས་དེར།།

གཞུག་གི་གྲིབ་མ་དེ་ཡང་དགོད་རེ་བྲོ།།

བརྡ་རྟགས་ཐུར་དུ་འགྲིལ་བའི་མདའ་རྩེ་ཡང་།།

དབུགས་ཀྱི་རྒྱུ་བ་ཐག་ཐག་གྲག་སྟངས་དེ།།

སང་གི་འཇའ་ཚོན་ཐོགས་པའི་གནམ་གཏམ་ཁྲོད།།

དགུང་གི་ཉི་མ་ལྡོག་པ་ཡོད་རེ་ཀན།།

འགྲམ་རུས་སྐྱུག་ལྡད་རྒྱག་པའི་མི་རྐང་ཞིག།

ཁོང་གི་སྨྲེ་སྔགས་འབྱིན་པའི་ཚུགས་ཀ་དེ།།

སོག་པ་རྡོ་བས་རྡུང་བའི་མེ་ལོང་ངོས།།

ལྷམ་གྱི་ཀྲད་པ་ཡིན་ཡང་ངུ་མ་དགོད།།

༡༠༡༩ རང་མལ་དུག་གསུམ་གྱི་ལྡིང་ཁང་ནས་རེས་གཟའ་ཉི་མའི་ཉིན།།

{མཐོང་སྒང་གི་མ་ཡུམ།}

མཐོང་སྒང་གི་མ་ཡུམ།

ཁ་བ་བུ་ཡུག་འཐབ་པའི་རི་སྒང་ན།།

མཁུར་མགོ་འཁྱག་ལ་འབྱར་བའི་སྐྱེས་མ་དེའི།།

སྐྲ་ལོ་ལྷགས་པས་འདེད་པའི་གྲིབ་གཟུགས་དེ།།

ལོ་ཟླ་འཕྲེད་ཀྱི་བཅད་པའི་རྨི་ལམ་ཡིན།།

གཉེར་རིས་ཐགས་སུ་བཀྲ་བའི་ངོ་གདོང་ལ།།

ལག་པ་རྡོ་བར་བཤོས་པའི་ཟུག་གཟེར་དེ།།

ཙག་དང་སྐྱི་བསེར་འཐབས་པའི་མེ་ལོང་ནང་།།

དོ་ནུབ་མེ་ཁ་དྲོ་བའི་གཏམ་རྒྱུད་རེད།།

ནུབ་ཁའི་ཉི་གཞུག་འདེད་པའི་འཕྲེང་སེམས་ལ།།

རི་ལུང་ཕྲེང་བ་བསྒྲིགས་པའི་ཕ་རོལ་ནས།།

སེམས་ཀྱིས་འཚོས་པའི་ཁོ་བོ་བུད་རེ་རན།།

དགོང་ཁའི་མཚམས་སྤྲིན་དལ་ཅིག་སྡོད་རེ་ཨང་།།

2019

རྒྱལ་བ་ལྷ་ལས་བབས་པའི་མ་ཡུམ་གྱི་དུས་ཆེན་ལ། བདག་གི་མ་ཡུམ་དྲན་ཡུལ་དུ་འཁོར་ཙམ་ཉིད་ནས། མཚན་དགུང་ཆུ་ཚོད་ ༡༢ ཐོག་ཡི་གེར་འདུ་བྱས་པའོ།།

{ཆམ་ནད་ཐེངས་གཅིག}

ཆམ་ནད་ཐེངས་གཅིག

ལ་མོ་འཕྲེད་ཀྱིས་བཅད་པའི་རླུང་འཕྲིན་དེས།།

གཤོངས་ཀྱི་མེ་ཏོག་ལྒང་བུ་འཇོམས་ལ་ཉེ།།

ཁ་བ་གངས་ཀྱི་འཐབ་ར་འུར་སྟངས་ཀྱིས།།

མཐའ་ཡི་རྒྱ་མཚོ་རྨང་ནས་འཁྱོམས་སུ་འཇུག།

རུམ་གྱི་གཏམ་རྒྱུད་དྲོན་མོའི་རྨི་ལམ་དེ།།

ད་ནང་ཞོགས་ཀའི་སྨུག་ཟིལ་འཐིབ་སྟངས་ཤིག།

རྡུལ་གྱི་འཐབ་ར་རྒོད་པའི་ཉི་ངོགས་ན།།

སང་གི་འཇའ་མཚོན་འཐུ་བའི་ཐན་ལྟས་ཡིན།།

རྐང་ལམ་རྡོག་པས་འདྲུད་པའི་ཡུ་མོ་དེ།།

རྨིག་པ་རྡོ་བར་འགྱུར་བའི་གནའ་གཏམ་རང་།།

མཛེས་པ་ཕྱི་རུ་ལུད་པའི་དོ་དགོང་ཡང་།།

དགོང་གའི་མཚམས་སྤྲིན་མིག་ཆུ་འབྱིད་རེ་རན།།

༢༠༡༩

{རོ་ལངས་མི་རབས།}

༈ རྒྱ་ཆེའི་དྲ་གྲོགས་ཀློག་པ་པོ་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ་བ་དང་ཆབས་ཅིག

དེ་རིང་འདི་གར་ཁོ་བོའི་{རོ་ལངས་མི་རབས།}ཞེས་པའི་དྲ་ཚིགས་འདི་སྔར་ལས་གྲ་ཇེ་རྒྱས་དང་ཡར་སྐྱེད་རྣམ་པར་བསྐྱར་བཟོ་བྱས་པ་ཡིན་པས། སླར་ཡང་ཀློག་པ་ཡོངས་ལ་མུ་མཐུད་དེ་རྩོམ་ཡིག་སྤྱན་འབུལ་ཞུ་རྒྱུའི་འཆར་གཞི་ཡིན་པར་ཐུགས་འཇགས་འཚལ།

རོ་ལངས་མི་རབས་དྲ་ཚིགས་རྩོམ་སྒྲིག་པས།

2018ལོ་དང2019ལོའི་ནོ་པེལ་རྩོམ་རིག་བྱ་དགའ་ཁྱབ་བསྒྲགས་བྱས་པ།

2018ལོ་དང2019ལོའི་ནོ་པེལ་རྩོམ་རིག་བྱ་དགའ་ཁྱབ་བསྒྲགས་བྱས་པ།

 

  2019ལོའི་ཟླ 10 བའི་ཚེས 10 ཉིན་གྱི་པེ་ཅིང་དུས་ཚོད་ཀྱི་དགུང་དྲོའི་ཆུ་ཚོད་བཅུ་དགུ་པར།  སི་ཝེས་དན་རྩོམ་རིག་སློབ་གླིང་གིས་སི་ཐོག་ཁོར་མོ་རུ་བསྒྲགས་པའི་གནས་ཚུལ་ལྟར་ན།  2018ལོའི་ནོ་པེལ་རྩོམ་རིག་བྱ་དགའ་ཕོ་ལན་གྱི་རྩོམ་པ་པོ་ལྕམ་ཨོལ་གྷ་ཊོ་ཁཱར་ཛོག(Olga Tokarczuk)ལགས་ལ་སྤྲོད་རྒྱུ་དང་།  

2019 ལོའི་ནོ་པེལ་རྩོམ་རིག་བྱ་དགའ་ཨོ་སི་ཁྲི་ཡའི་རྩོམ་པ་པོ་སྐུ་ཞབས་པེ་ཊིར་ཧཱན་ཌིག (Peter Handke)ལགས་ལ་བསྩལ་ཏེ་ཁོང་གཉིས་ཀྱི་རྩོམ་རིག་ཐད་ཀྱི་གྲུབ་འབྲས་ལ་གཟེངས་བསྟོད་བྱ་རྒྱུ་ཡིན་པ་ཁྱབ་བསྒྲགས་བྱས་པ་རེད། 

སི་ཝེས་དན་རྩོམ་རིག་སློབ་གླིང་གིས་ལྕམ་ཨོལ་གྷ་ཊོ་ཁཱར་ཛོག་ལ “ཨོལ་གྷ་ཊོ་ཁཱར་ཛོག་ལགས་ཀྱིས་ཤེས་བྱ་ཀུན་བཏུས་རྣམ་པའི་སེམས་ཚོར་གྱི་ངར་ཤུགས་ལ་བརྟེན་ཏེ་འཆར་སྒོ་ཕུན་སུམ་ཚོགས་པའི་ལྷུག་རྗོད་ཀྱི་ཐབས་རྩལ་ལས་གང་ཞིག་ནས་རབ་ཏུ་བརྒལ་བའི་ཚེ་སྲོག་གི་མངོན་ཚུལ་ཞིག་བཞེངས་སྐྲུན་ཐུབ་ཡོད”ཅེས་པའི་མིང་ཐོག་ནས་ནོ་པེལ་རྩོམ་རིག་བྱ་དགའ་སྤྲད་ཡོད་པ་དང་།   པེ་ཊིར་ཧཱན་ཌིག་ལ“པེ་ཊིར་ཧཱན་ཌིག་གིས་ཐུན་མོང་མ་ཡིན་པའི་རྗོད་པ་དང་བརྩམས་ཆོས་ཀྱི་ཤུགས་རྐྱེན་ལས་འགྲོ་བ་མིའི་ཉམས་མྱོང་གི་སོ་མཐའ་དང་དམིགས་བསལ་གྱི་ཁྱད་ཆོས་སྔོགས་ཐུབ་ཡོད”ཅེས་པའི་མིང་ཐོག་ནས་ནོ་པེལ་རྩོམ་རིག་བྱ་དགའ་སྤྲད་ཡོད། 

 ཨོལ་གྷ་ཊོ་ཁཱར་ཛོག(Olga Tokarczuk)

       རྩོམ་པ་པོ་ལྕམ་ཨོལ་གྷ་ཊོ་ཁཱར་ཛོག་གི་བརྩམས་ཆོས་ཀྱི་ཁྲོད་དུ་དམངས་ཁྲོད་ཀྱི་ངག་རྒྱུན་དང་།  ལོ་རྒྱུས་སྙན་རྩོམ།  ལྷ་སྒྲུང་།  དེ་བཞིན་དེང་རབས་ཕོ་ལན་གྱི་འཚོ་བ་དང་མཛེས་ལྗོངས་བཅས་མཉམ་འདྲེས་བྱེད་མཁས་པོ་ཡོད།   མོ་རང1962ལོར་སྐྱེས་པ་དང་།   ཕོ་ལན་གྱི་ཤུགས་རྐྱེན་ཆེས་ཆེ་བའི་དེང་རབས་བརྩམས་སྒྲུང་གསར་རྩོམ་མཁས་ཅན་པའི་གྲས་ཡིན།  1987ལོར་གཙུག་ལག་སློབ་ཆེན་ག་གེ་མོ་རུ་སེམས་ཁམས་རིག་པའི་སྐོར་ལ་སྦྱང་བ་མཐར་ཕྱིན་མཛད།  1987ལོར་སྙན་དེབ《 མེ་ལོང་ནང་གི་གྲོང་ཁྱེར》 ཞེས་པ་པར་སྐྲུན་སྒོས་རྩོམ་སྟེགས་སུ་བུད་པ་དང་།    བསྟུད་མར་སྒྲུང་རིང《 དེབ་ནང་གི་མིའི་ཡུལ་སྐོར་ཟིན་ཐོ》 《E.E.》  《བསྐལ་པ་ཡ་ཐོག་དང་གཞན་དག་གི་དུས་ཚོད》  སོགས་པར་དུ་སྐྲུན་པ་ལ་ཕོ་ལན་གྱི་དཔྱད་གཏམ་ལས་རིགས་སུ་བསྔགས་བརྗོད་ཀྱི་མེ་ཏོག་གཏོར་ཡོད།  མོས་བརྩམས་ཆོས་ནང་དམངས་ཁྲོད་ངག་རྒྱུན་དང་ལྷ་སྒྲུང་། ཆོས་ལུགས་ཀྱི་གཏམ་རྒྱུད་སོགས་གཞི་རྒྱུ་མཉམ་འདྲེས་བྱས་ནས་ཕོ་ལན་རྒྱལ་ཁམས་ཀྱི་ལོ་རྒྱུས་ལས་དབང་དང་འཚོ་བ་དངོས་ལ་ལྟ་རྟོག་གཟབ་ནན་བྱེད་ཀྱིན་ཡོད།  སྔ་རྗེས་སུ་སྒྲུང་རིང《 བསྐལ་པ་ཡ་ཐོག་དང་གཞན་དག་གི་དུས་ཚོད》 དང《 ཉིན་མོའི་ཁང་པ་དང་མཚན་མོའི་ཁང་པ》 ཞེས་པར་ཕོ་ལན་གྱི་ཆེས་མཐོའི་རྩོམ་རིག་བྱ་དགའ་Nikeལ་ཐེངས་གཉིས་ཐོབ་པ་དང་དཔྱད་གཏམ་ལས་རིགས་ཀྱི་ཁས་ལེན་ཐོབ་པ་མ་ཟད།  ཀློག་པ་པོའི་སྡེ་ཡི་དགའ་བསུ་ཡང་ཐོབ་པ་རེད།   མོས་བརྩམས་སྒྲུང་དེ་ནི་རྒྱུད་འཚོལ་བའི་སེམས་ཁམས་ཅན་ཞིག་ཡིན་ཞིང་།  རང་ཉིད་ཀྱི་འབྱུང་ཁུངས་དང་སྐྱེ་རྒྱུད་འཚོལ་ཞིབ་བྱས་ཏེ་དངོས་ཡོད་འཚོ་བའི་ཁྲོད་ཚུག་ཐུབ་ཏུ་གནས་ཐུབ་པ་བྱ་འདོད་ཅེས་བརྗོད་མྱོང་ཡོད།

 

པེ་ཊིར་ཧཱན་ཌིག (Peter Handke)

      ཨོ་སི་ཁྲི་ཡའི་རྩོམ་པ་པོ་པེ་ཊིར་ཧཱན་ཌིག   1942ལོར་སྐྱེས།  ཨོ་སི་ཁྲི་ཡའི་སྐད་གྲགས་ཆོད་པའི་བརྩམས་སྒྲུང་རྩོམ་པ་པོ་དང་འཁྲབ་གཞུང་རྩོམ་པ་པོ་ཞིག་ཡིན།  འཇར་མན་སྐད་ཀྱི་དེང་རབས་རྩོམ་རིག་གི་གལ་ཆེ་བའི་རྩོམ་པ་པོ་ཞིག་དང་རྩོད་གཞི་ཆེས་ཆེ་བའི་རྩོམ་པ་པོ་ཞིག་ཀྱང་ཡིན།  1973ལོར་བྷེ་དབྱི་ནཱ་རྩོམ་རིག་བྱ་དགའ་ཐོབ་པ་དང་།  2009ལོར་ཁབ་ཁཱ་རྩོམ་རིག་བྱ་དགའ།  2014ལོར་རྒྱལ་སྤྱིའི་དབྱི་བྷི་ཧྲེང་བྱ་དགའ་ཐོབ་པ་རེད།  1965ལོར་པེ་ཊིར་ཧཱན་ཌིག་ཡིས་ཁོང་གི་སྒྲུང་རིང་དང་པོ《   སྦྲང་མ་སེར་པོ》  ཞེས་པ་ཡོངས་བསྒྲགས་ངང་སྤེལ་བ་དང་དེ་རྗེས་སྦྱོང་ཚན་དོར་ནས་ཆེད་ལས་རྩོམ་པ་པོའི་ལས་སུ་འབད།   1966ལོར་ཁོང་གི་ཟློས་གར《 གཟིགས་མོ་བར་སྤྱོ་བ》 ཞེས་པ་སྤེལ་རྗེས་ཁོང་ལ་དོ་སྣང་ཆེན་པོ་བྱས། 1967ལོར་ཁོང་གི་སྐད་གྲགས་ཆེ་ཤོས་ཀྱི་ཟློས་གར《 ཁཱ་སི་ཐི》 ཞེས་པ་སྤེལ་ཞིང་།ཡོ་རོབ་ཏུ “play of the Decale”ཞེས་པའི་མཚན་སྙན་ཐོབ་པ་དང་།  ཁོང་གི《  ཁཱ་སི་ཐི》  ཞེས་པ་འཇར་མན་སྐད་ཀྱི་ཟློས་གར་ནང་འཁྲབ་་ཐེངས་ཆེས་མང་ཤོས་ཀྱི་བརྩམས་ཆོས་ཤིག་ཏུ་གྱུར་ཡོད།  1973ལོར་ཁོང་ལ་ཟློས་གར་གྱི་གྲུབ་འབྲས་མངོན་གསལ་དོད་པོའི་དབང་གིས་འཇར་མན་སྐད་ཀྱི་རྩོམ་རིག་ལས་རིགས་ཀྱི་མཚན་སྙན་ཆེས་མཐོ་བའི་བྱ་དགའ་ཐོབ་པ་དང་སྐབས་དེ་དུས་ཁོང་དགུང་གྲངས31ཙམ་ཡིན།  ཁོང་གིས “གཏམ་བརྗོད་ཟློས་གར”གྱིས་འཁྲབ་སྟོན་པ་དང་ལྟད་མོ་བ། ཟློས་གར་དང་དོན་དངོས་དབར་གྱི་བར་ཐག་གཙོ་ཆེར་འཛིན་པའི་སྲོལ་རྒྱུན་གྱི་བྲི་ལུགས་མགོ་རྟིང་སློག་སྟེ “ཆ་རྒྱུས་མེད་པ”དང་ཡང་ན“བར་ཐག་ཡོད་པའི”ལམ་སྲོལ་ཞིག་ཕྱེ་བ་ལ་གཞི་བྱས་ཏེ།  2009 ལོར་རྒྱལ་སྤྱིའི་ཁབ་ཁཱ་རྩོམ་རིག་བྱ་དགའ་ཐོབ།

    པེ་ཊིར་ཧཱན་ཌིག་ནི་ནུབ་ཕྱོགས་སུ་གླེང་ཕྱོགས་མང་བའི་རྩོམ་པ་པོ་ཞིག་སྟེ།  2014 ལོར་པེ་ཊིར་ཧཱན་ཌིག་ལ་ཟློས་གར་ལས་རིགས་ཀྱི་མཚན་སྙན་མཐོ་ཤོས་ཏེ་རྒྱལ་སྤྱིའི་དབྱི་བྷི་ཧྲེང་བྱ་དགའ་སྤྲད་པ་ལ།  དཔྱད་འདེམས་ཨུ་ལྷན་གྱི་ཁོངས་མི་འགའ་ཞིག་གིས་བྱ་དགའ་དཔྱད་བསྡུར་བྱས་འབྲས་ལ་མི་འདོད་པའི་རྣམ་འགྱུར་གྱི་ངོས་ནས་ལས་ཁུར་དགོངས་ཞུ་བྱས་པ་དང་།  ཐ་ན Bernt Hagtvet ཡིས“པེ་ཊིར་ཧཱན་ཌིག་ལ་རྒྱལ་སྤྱིའི་དབྱི་བྷི་ཧྲེང་བྱ་དགའ་སྤྲད་པ་ནི་ལོ་རྒྱུས་ཐོག་བྱུང་མ་མྱོང་བའི་སྐྱུག་བྲོ་བའི་གནས་ཚུལ་ཞིག་རེད”ཅེས་སྐྱོན་འཛུགས་བྱས།   གཞན་ཡང་པེ་ཊིར་ཧཱན་ཌིག་རྒྱལ་སྤྱིའི་དབྱི་བྷི་ཧྲེང་བྱ་དགའ་ལེན་པར་སླེབས་སྐབས་ཚོགས་ཞུགས་རྔམ་སྟོན་པ་ཁག་གཅིག་གིས་ཁོང་ལ་བྱ་དགའ་དེ་མི་འཐོབ་པའི་རྒོལ་གཏམ་བཏང་བ་རེད།   འོན་ཀྱང་ཕྱོགས་གཞན་ཞིག་ནས།  2010 ལོར་བྱ་དགའ་དེ་ཐོབ་མཁན་ལྗང་ཧྥེ་སིས（Jon Fosse）མཇུག་འབྲས་འདི་ལ་དགའ་མོས་བྱེད་ཀྱིན་ཡོད་པ་མ་ཟད།  ཁོང་གིས་པེ་ཊིར་ཧཱན་ཌིག་ནི་མཚན་སྙན་དེ་ཐོབ་མཁན་ཆེས་འཇོན་ཐང་ལྡན་པ་རུ་ངོས་འཛིན་གནང་གིན་ཡོད་པ་མ་ཟད།  པེ་ཊིར་ཧཱན་ཌིག་ལ་ནོ་པེལ་རྩོམ་རིག་བྱ་དགའ་འཐོབ་དབང་ཡོད་ཅེས་ལུང་བསྟན་ཡོད་པ་རེད། 

ཡོང་ཁུངས། 

མཆོད་མེ་བོད་ཀྱི་རྩོམ་རིག་དྲ་བ་ལས་དྲངས།

རྨི་ལམ་ཁྲ་ཁྲ།

རྨི་ལམ་ཁྲ་ཁྲ།

རོལ་དབྱངས་དེ་འཁྲོལ་ཤོག་དང་།།

རྨ་ཁ་དེ་དྲུབས་ནས་ཡོང་།།

ཁ་དོག་དེར་འཇུས་ཤོག་དང་།།

སང་ཉིན་གྱི་འཇའ་ཚོན་ཡིན།།

རྨི་ལམ་འདི་སློས་ཤིག་དང་།

སྐར་མདའ་ཡང་ལྷུང་ནས་སྲིད།།

དྲི་བསུང་འདི་རྔུབས་ཤིག་དང་།།

སྐྲ་ལོ་ཡང་གནག་ཅིང་སྣུམ།།

དོན་སྙིང་དེ་ཕྱུངས་ཤིག་དང་།།

ཁྲག་རལ་གྱི་མཛེས་པ་རེད།

ཟུར་མིག་དེར་གཡོལ་ཞིག་དང་།།

ལག་སོར་གྱི་སེན་རྗེས་རེད།།

སྣ་བུག་འདི་ཁོབ་ཅིག་དང་།།

གྱ་གྱུ་ཡི་སྣང་བ་ཡལ།།

དགུ་ཚིགས་དེ་ཕུད་ཞོག་དང་།།

ཐོ་རེངས་ཀྱི་སྐར་ཆེན་རེད།།

2019